Главная
страница 1

Тропари и кондаки святым Собора Кольских святых и чтимым иконам




Тропарь Божьей Матери ради иконы Ея «Тихвинской - Мурманской». Глас 4


Днесь возсия неизреченно / на Мурмане икона Богоматере, / и яко светозарным солнцем, / пришествием тоя озарися вся Земля Полнощная. / Притецем, людие, вси к тихому и доброму пристанищу, / чудному образу Царицы Богородицы, / верно припадающе и вопиюще: / О Всемилостивая Владычице, / за спасительное Твое смотрение, / чуднаго образа к нам пришествие, / не остави раб Твоих / и не отрини моления недостойных, / ризою Твоею честною нас защити и от всех зол избави, / молящи Сына Твоего, Христа Бога нашего, //да спасет души наша, яко Милосерд.

Кондак Божьей Матери ради иконы Ея «Тихвинской - Мурманской». Глас 8


Днесь всемирная радость возсия нам велия: / даровася цельбоносная, Владычице, икона Твоя. / Вси святии земли Кольския руце к ней простирают, моляше, / и с ними страна Полнощная, радуяся, торжествует. / Темже мы духовно празднуем и тепле вопием Ти: // Не остави милость Твою от нас, но пребуди с нами во век, Всеблагая.

Тропарь Всем святым Кольским. Глас 1


Светлый сонме подвижников земли Кольския, / Севера тьму сиянием веры озарившии / отцы святии, благочестием преукрашеннии, / служителие Таин Божиих благоговейнии, / боголюбивии иноцы и учителие покаяния, / миряне, чистым житием Создателю угодившии, / языка лопскаго богомудрии просветителие и наставницы, / новомученицы и исповедницы, за Христа души положившии, / в горьких работах даже до смерти Его исповедавшии, // молитеся ко Господу спастися душам нашим.

Кондак Всем святым Кольским. Глас 3


Днесь лик святых, в земле Кольстей Богу угодивших, / предстоит в церкви и невидимо за ны молится Богу, / придите, христоименитии люди, / память их почтим и возопиим к ним: / Радуйтеся, отцы преблаженнии Трифоне, Феодорите и Варлааме, / со многими нашего края небесными покровители, / вы бо, яко звезды святозарныя, во мраце Севера возсияли есте, / словесы и чудесы своими вся просветивше, / и ныне молитеся Господеви / веру Православную зде незыблему соблюсти // и даровати нам велию милость.

Тропарь преподобному Феодориту. Глас 4


От юности, премудре, прилежно подвизался еси, / пустынный жителю и в телеси Ангеле, / исцеляеши недужныя и души верою просвещаеши, / апостолом сопричастниче, Слово Божие возвестил еси, / всея Лапландии просветителю, / обителей и храмов Божиих зиждителю, / Феодорите, отче всеблаженне, / моли Христа Бога // спастися душам нашим.

Кондак преподобному Феодориту. Глас 5


Обители Соловецкия отрасле многоплодная, / монахов наставниче, покаяния проповедниче, / царя земнаго дары Небеснаго ради Царствия отвергл еси, / красотою душевною в Земли Северней просиял еси, / радуйся, богомудре отче Феодорите, // земли Кольския заступниче теплый.

Тропарь преподобному Трифону Печенгскому. Глас 4


От мятежа мирскаго в пустыню удалился еси, / к немерцающему Свету притекая, / и слез твоих теченьми, отче Трифоне, / пустыни Северныя возделал еси, / пощеньми и из глубины воздыханьми / чудес благодать от Бога прием, / монахов Печенгских родителю и лоплян апостоле, / моли Христа Бога // спастися душам нашим.

Кондак преподобному Трифону Печенгскому. Глас 1


Православным смыслом юношская возжеления возненавидев / очистився покаянием и страстей отсечением, / укрепився постом, бдением и молитвами непрестанными, / Святой Троицы обитель воздвигл еси / и Печенгских иноцев Христови чистых представил еси. / И горшее покорив лучшему, / сокрушил еси выя бесом, / и постом возсиял еси в мире, / паче сияния солнечнаго твоя добродетели, / Земли Северныя похвало, // преподобне отче наш Трифоне.

Ин тропарь преподобному Трифону Печенгскому. Глас 8


Пути, вводящаго в жизнь, наставник и учитель был еси: / первее бо, преподобне отче наш Трифоне, / пришел еси в часть Норвегския земли / и в последних концех северныя страны языки просветил еси, / породив водою и Духом Святым, / и священная твоя чада в безплодней пустыни, / яко древа масличная, насадил еси, / велию обитель Святыя и Живоначальныя, Единосущныя и Нераздельныя Троицы создал еси / и монахов множество собрав. / Тем, яко апостолом и пустынножителем равночестна чтуще тя, / прилежно припадающе, вопием: / моли всех Бога за Русскую землю, за область твою и за вся люди, / почитающия память твою.

Ин кондак преподобному Трифону Печенгскому. Глас 8


Все твое умное желание к Богу вперив,/ Того званию невозвратно от души последовал еси,/ в пустыню конечную вселився,/ и, тамо ангельски и равноапостольне пожив,/ многим путь был еси ко спасению./ Сего ради и Христос тя прослави и даром чудес обогати./ Темже вси вопием ти:/ радуйся, исповедниче Христа Бога нашего;/ радуйся, граду твоему неколебимое утверждение, Трифоне, отче наш.

Тропарь преподобномученикам Печенгским. Глас 5


В пустыни неплодней преславнии плоды Духа Святаго стяжавшии, / кротостию и послушанием Христу уподобилися есте / и яко агнцы лютую смерть от меча прияли есте, / благочестивии иноцы и христолюбивии миряне, на Печензе пострадавшии, / молите Христа Бога // за вся люди, чтущия память вашу.

Тропарь преподобному Варлааму Керетскому. Глас 1


Божественною свыше просветився благодатию, / евангельски Христу последовал еси / и Того во всем воли повинулся еси, / и сего ради восприим силу на врага сопротивнаго, / не убоялся еси морския тяготы и студени, ниже уклонися, / в своем плаче по Бозе не усыпая, /в мале ладиице по водам шествие творил еси, / против зельного обуревания плавав, / и равноангельное житие пожив, / темже и по преставлении источаеши чудес благодать, / да вси тебе возопием: Варлааме преблаженне, // моли Христа Бога, да спасет души наша.

Кондак преподобному Варлааму Керетскому. Глас 1


Все умное свое желание к Богу вперив, / житейские молвы до конца отринул еси, / в молитвах и слезах и злостраданиях плоть свою изнуряя, / добре подвизався противу невидимаго врага козней / и, победив я, путь морский от ядовитаго червия человекам без вреда сотворил еси, / и веселяся пришел еси к небесным чертогам, / где ныне, со ангелы Святей Троице предстоя, молишися непрестанно, / сохраняя нас от враг видимых и невидимых / и ненаветны соблюдая от скорбей, зол и болезней, / да твоими молитвами спасемся, Варлааме преподобне, отче наш.

Ин тропарь преподобному Варлааму Керетскому. Глас 1


Божественною свыше просветився благодатию, преподобне, / мир оставил еси, / житейскую печаль и всяк мятеж мира сего / любве ради Христовы со дерзновением отвергл еси, / евангельски Христу последовал еси, / и, Того ярем взем, во всем воли Его повинулся еси, / и весь разум и сердце к Нему неуклонно возложил еси, / Христа ради тело свое изнуряя постом и бдением, в молитвах своих не усыпая, / Бога милостива творя и Пречистую Богородицу Молебницу предлагая, / и сего ради от Бога восприем власть и силу на сопротивнаго врага, / не убояся воздушныя и морския тяготы и студени, ниже уклонися, / и морскою пучиною в мале ладиице по водам шествие творя, / против зельнаго обуревания плаваше, / промышлением Божественнаго разума направляемь, / и около Святаго Носа непроходимый путь морский / от ядовитаго червия / благопроходен человеком без вреда сотворил еси молитвами своими, / и многим терпением во временней жизни подвиг совершил еси, / и, равноангельное житие пожив, / темже и по преставлении источаеши чудес благодать / иже верою приходящим к тебе / Варлааме, преблаженне отче наш, / вопием ти: моли Христа Бога, / да спасет души наша.

Тропарь преподобному Евфимию Корельскому, Кольскому. Глас 4


Многосветлыми лучами / блистают деяния твоя, преподобне отче Евфимие: / брега в последних концех Северныя страны / церквами и скитами, яко древами масличными, украсил еси. / Долготу путную и опасности моря ни во чтоже вменяя, / восхваляя пустынножития рачительство, / дошед даже до Норвегския земли, / не убоялся еси враги крепкия и бранноискусныя, // облистав благочестия светлостьми пустыни Полунощныя.

Кондак преподобному Евфимию Корельскому, Кольскому. Глас 1


Взыскуя Христа, вожделеннаго бисера, / и Того любовию уязвися, преподобне Евфимие, / устремился еси в суровыя пустыни / Севернаго помория, / древним начальником скитстим поревновав, / леса и пустыни облагоухал еси / богоугодными молитвами твоими, / темже и Христос тя прослави: / вожделенных горних чертогов достигл еси, // и нас учи небесному восходу.

Тропарь преподобным Астерию (Аксию), Авксентию и Тарасию Кашкаранским, Соловецким. Глас 4


Постническое и равноангельное житие приимше, / преподобнии отцы Астерие, Авксентие и Тарасие, / в Поморие пустынное удалилися есте, / аки в тихое пристанище, / на наволок Кашкаранский вселилися есте, / и многая лета пожили есте, / и непрестанныя молитвы яко копие в руках имуще, / крепко победили есте бесовская ополчения, / благодать приимше целити недуги душ и телес наших. / Тем зовем вам: // Радуйтеся, преподобнии отцы Астерие, Авксентие и Тарасие, монахов удобрение.

Кондак, преподобным Астерию (Аксию), Авксентию и Тарасию Кашкаранским, Соловецким. Глас 8


Троице святая Кашкаранская, / Соловецкаго отока отрасле многоплодная, / в правиле иночестем возсиявшая светло, / преподобнии отцы Астерие, Авксентие и Тарасие, / поминайте ны, любовию хвалящия вас.

Тропарь преподобному Астерию (Аксию) Кашкаранскому, Соловецкому. Глас 1


Яко звезде пресветлей тезоименитый, / возсиял еси в Полунощней земли, преподобне отче наш Астерие, / и монашескими добродетельми первее украсився, / на Терстем брезе пустыннем аки в тихое пристанище вселился еси, / и тьму нощи духов отгнал еси, / и своею смертию от тяжкаго недуга / люди поморстии исцелил еси, / душу свою за други своя полагая. / Не умолчи убо и ныне, / о недузех и скорбех наших моляся, Астерие преподобне.

Тропарь новомученикам и исповедникам Кольским. Глас 4


Святые новомученици и исповедници Кольстии, / светолепнии архиереи и священници, / иноци, инокини и миряне, / вернии Господеви мужие, жены и чада, / на Севере жестокими гонители собраннии / и в каторжных работах умученнии /, за Христа кровь пролиявшии, / отцы, братие и сестры наша, / за Господа смерть приявшии, / молите Человеколюбца Бога // избавитися нам от всякаго зла покаянием.

Тропарь преподобномученику Феодору (Абросимову), Печенгскому. Глас 5


Преподобномучениче Феодоре, / злострадания от безбожных и горькие работы претерпел еси, / Церкви послушание даже до смерти явил еси, / сего ради венцем мученическим венча тя Христос Бог, / Егоже моли, богодарованный заступниче земли Кольския, // да очистимся от всякия скверны покаянием.

Кондак преподобномученику Феодору (Абросимову), Печенгскому. Глас 8


Вземше крест свой, Христу последовал еси, / монашеское житие и вольное страдание паче сладости мира сего возлюбил еси, / веру Христову даже до конца исповедал еси, отче Феодоре, // избави нас от бед молитвами твоими.

Тропарь преподобномученику Моисею (Кожину), Оленицкому. Глас 1


Святых Таин Христовых верный служителю, / покаяния проповедниче и края Кольскаго печальниче, / преподобномучениче Моисее, // моли Милостивого Бога спастися душам нашим.

Кондак преподобномученику Моисею (Кожину), Оленицкому. Глас 2


Уподобился еси пророку Моисею, / душу свою за погибающую паству положил еси, / узы темничные и смерть за Христа претерпел еси, / спасай нас молитвами твоими, отче Моисее, // пастырю наш преблаженный.

Тропарь преподобному Безымянному иноку Терскому. Глас 8


В море Ледоватом успение обрел еси, Безымянне, / в телеси нетление стяжал еси, преподобне, / неведомый миру иноче земли Терския, / но Богови ведомый и чудесами явленный. / В ловитве рыбней помощниче скорый / и целителю усердный в немощах и болезнях, / преподобне Безымянне иноче, // моли Христа Бога спастися душам нашим.

Кондак преподобному Безымянному иноку Терскому. Глас 2


Всем от века прикровенно Богу угодившим / похвало, и память, и радование, / Безымянне Иноче-заступниче, / помяни имена наша пред Христом Господом, // прилежно чтущих память твою.

Молитвы святым Собора Кольских святых.

Молитва преподобному Трифону Печенгскому.

О Всесвятыя Троицы богоугодниче, о блаженнейший и равноапостольный пастырю, преподобне отче наш Трифоне! Не забуди паствы твоея, но поминай нас во святых твоих и богоприятных молитвах; стадо твое, еже сам, пришествием твоим собрал и упасл еси, сохрани и защити.

Вемы бо, угодниче Божий, како православным смыслом юношская возжеления возненавидев, клевреты и вои своя оставил еси. Како ангелов подобника и бесов противоборца провидя тя всея твари Зиждитель на покаяние огласил тя, яко втораго Павла, и человеколюбно к Себе призва, привед тя вскрай Северныя страны, где просветил ты еси святым крещением неведущий Творца лопарский род, за еже, во утверждение христианския веры, многа изгнания и злоключения подъял еси.

И близ реки Печенги в пустыню вселився, братию же из многих градов и весей собрав, велию обитель Святыя Троицы воздвигл еси, и, при отшествии к небесным селением, о посещении твоея обители пророчествия дар от Бога восприял еси, по смерти же многа чудеса и цельбы с верою просящим на мори и на суши сотворил еси и ныне твориши.

Темже молим тя, не забуди присещати чад твоих, моли за ны, преподобне отче, приходящия к тебе с верою, и за вся христианы, яко имеяй дерзновение к Безсмертному Царю Христу, всех Богу; не премолчи за ны ко Господу, и не презри нас, верою и любовию чтущих тя и поминающих святую память твою. Аще бо телом и преставился еси от нас, и мощи твоя до времени незримы нам суть, но и по смерти, живый духом, выну чудодействуеши. Молитвами твоими сохраняй нас от стрел и козней вражиих, и всякия прелести бесовския и от враг видимых и невидимых.

О пастырю наш добрый! Понеже выну в Троице славимому Богу, при Престоле Его непостижимаго величествия, неотступно в молитвах предстоиши, усердно к тебе прибегаем и просим: умоли и испроси нам время к покаянию, да в час исхода души прейдем от земных к небесным, от мытарств же воздушных и вечныя муки избавимся, и Небесному Царствию наследницы будем со всеми от века Богу угодившими.

О, преблаженне и преподобне отче наш Трифоне! Не презри и ныне нас, притекающих к тебе, яко да молитвами твоими и помощию спасаеми, славу и благодарение, хвалу и поклонение за вся в Троице Единому Богу, всех создателю возсылаем, Отцу и Сыну и Святому Духу, ныне и присно и во веки веков.

Молитва преподобному Варлааму Керетскому.

О, преподобне отче наш Варлааме, яко имеяй дерзновение ко Творцу, Избавителю всех, Иже в Троице Святей покланяемому истинному Христу Богу нашему, помяни нас, грешных и недостойных щедрот Его, у страшнаго престола Господа Славы и Судии Всех, идеже ты в сонме праведных предстоиши. Да подаст нам непотребным, погруженным в бездну греховную, покаяние сердечное, слез излияние и пламень стыда во утробах наших. В сим же пламене да сгорят вся наша беззакония и неправды, яже соделали есмы во вся дни живота нашего, да не будем наследницы пламене гееннскаго, готоваго пожрети души наши. Молим тя, отче святый, умоли Господа Вседержителя даровати нам сил и мудрости воеже избавитися от всякаго тлетворнаго страстнаго действа, от поползновения греховнаго. Упроси, отче Варлааме, Всемилостиваго Бога даровати нам ревнование о житии равноангельском, о стяжании молитвы чистыя, о пребывании в посте и добродетелех христианских. Не премолчи вопия за ны ко Господу, да с терпением течем на предлежащий нам подвиг имея в житии твоем образ назидания не токмо людем мирским, но и ликом иноческим. Научи нас, богоносне отче Варлааме, каятися твоим покаянием суровым, полагатися несумненно на волю Господа нашего, яко да и малая лодеица смертного сего телесе нашего без препятия одолеет бурный океан греховных страстей мира сего и к тихому пристанищу притечет, идеже ты и вси от века Богу угодившия пребывают во Христе Иисусе Господе нашем, Емуже подобает всякая слава, держава честь и поклонение со Безначальным Его Отцем, и со Пресвятым и Благим и Животворящим Его Духом во веки веков. Аминь.



Ина молитва преподобному Варлааму Керетскому.

О Преподобне отче наш Варлааме, яко имеяй дерзновение ко Творцу, Избавителю всех, Иже в Троице Святей покланяемому истинному Христу, Богу нашему, помяни нас в молитвах своих и всех нас моления, Богу воссылаемая, приими и принеси я ходатайственне. Молим тя, избави нас от всяких напастей, и на мори от зельнаго обуревания, и от всех видимых и невидимых враг ненаветны соблюди, яко да твоими молитвами, святе, согрешений наших оставление получим и вечных благ сподобимся благодатию и человеколюбием Господа нашего Иисуса Христа, Емуже слава со Отцем и Святым Духом ныне, и присно и во веки веков. Аминь.



Канон преподобному Варлааму Керетскому1



Тропарь. Глас 8: Пустынный житель и во плоти аггел, чюдотворець показася, богоносе, отче нашь, Варламе. Пощения ради и бдения, и молитв небесныя дары прием, исцеляеши недужных и души приходящих ти с верою. Слава давшем ти крепость, слава венчавшем тя, слава деющему тобою всем исцеление.

Слава и ныне, Богородичен: Стена непобедимая нам христианом еси, Богородице, Дево.
Канон преподобному Варламу Керетьцкому, новому чюдотворцу. Ему же краегранесие: Похвалу пою Варламу, новому чюдотворцу Керетцкому. До 9-й песни сложено мерою и амьфикою по акростихиде, а в девятой песни имя списавшего.

Песнь 1. Глас 8.

Ирмос: Море огустевая, погрузив со оружием гордаго фараона и люди спасе от работы и введе я в гору святыня, вопиюща: «Поем тебе, Богу нашему, песнь победную, яко прославися». Препетая соестественная Троице, иже паче ума дары рабомь си дая и моему мрачному уму светлую посла благодать, всех страстей очищающую, песнь ныне начинающи ми.

Освящен убо быв Божественною благодатию служити святому жертвенику, всесожжение словесное принесл еси приятно Богови, яко же Аарон по закону агньца во всесожжение, проображая волное страдание и смерть Христову за весь мир.



Слава: Христову плоть роздробляя рукама, и служитела сего истинный явлься, возношения в премирная вознося и оттуду и мир людем своим снося, Варламе пречюдне.

И ныне. Богородичен: Великий во пророцех Моисей тя написа иногда: Скрижаль богообразне, свещник света, и сень, и жезл процветший, Всенепорочная, и ручку, манну носящую, Ею же возведохомся от земли к высоте.
Песнь 3

Ирмос: Утвержен рукою своею Слове Божие небеса, на утвержение истиннна разума, утверди наша сердца на тя надеющихся.

Агньца несквернаго и богоприятного руками заколая, аггельскому житию поревновав непрестанными молитвами, зритель и жрець сподобися быти благодатию совершаем Святаго Духа.

Лукавый змий не терпяше зрети тя, выну Богу предстояща и молитву о людех приносящу, подходит на твою супругу, вадя насмешение странно. Ты жи ю яко узрев с яростию, на ню устремився, поражаеши ю смертною язвою и гробу предаеши.

Убийству убо совершившися и земли тело предав, отходиши во град в Колу к тамошнему иерею, и вествуя о убийстве и прося прощения, слезами землю омокая, о содеянных ти в ярости и невоздержании.

Повинувся убо иерей о содеянных ти и дает ти иго лехко: еже мертваго носити во гробе, дондеже изгниет тело умершия, самому же в посте и молитве пребывати, и таково воздержание имети, яко и рыбе точию единою на Пасху причащатися.

О убийстве убо мертваго таковое запрещение приим, течаша, радуяся, и, сие откопав, в судно вложив во гробе, сам же во второй устремився, с мертвым   шествуя летом дванадесят путей по окияну морю по непроходным местом.



Богородичен: Юже лествицу древле Ияков виде, прообразующу о тебе, Богомати, рече: «Степень Божия сия, яже достойно слышиши. Радуйся, Обрадованная, Господь с Тобою».

Седален. Глас 8: Носиши за плещми мертвое тело, подобяся древним скитским отцем, превитая по горам и по вертепам, яко птица, терпя смрад и всяку скорбь от мертвого телесе, яко же Никифор, великий патриарх, от разбойника умершаго в вертепе. Но он убо три месяцы, ты же три годы, дондеже мертвое тело изгни до конца, и тако паки земли предаде, тем исцеления дар от Господа сподобися прияти, Варламе преподобне, отче наш, моли Христа Бога грехов оставление подати чтущим любовию святую память твою.

Слава и ныне. Богородичен: Яко двуедину.
Песнь 4

Ирмос: Услыша же, Господи, слух твой и убояхся, яко неизреченным советом Бог сый присносущен от Девы произоде, воплощся. Слава славе Твоей, слава, Христе, пришествию Твоему.

Видел еси окиянскую пучину нечисту и человеки непроходиму от множества червия, иже остовы вертети карабли естество навыкьших. Яко ж Лествичный Иоанн вопиеть: «Сей же cвященныя воды кроплением отгнал еси на пучину моря.

Аще и естеством непобедими червие быша, но твоея молитвы Богу послушавши, отбегнути и отойти повелевши им не в проходимая места от Святаго Носу, идеже тма и мрак глубок без престани бывает.

Руце, иногда окровавленнии убийственною женскою кровию, ныне же чисти и святи, воздеши к вышнему о нас моля, преподобне, и испрошая от того благодать обрести, нам грехов оставления и будущих благ получити молитвами твоими.

Людие возрадовашася радостию неизглаголаннаю, получивши путь морский строен и благопоспешен, и благополучен, тя, своего заступника, воспевающа и Христа  величающа.

Аще не бы ты предстал и помогл, не бы толиких грузущих червий избавихомся. Ныне же тебе благодарная возглашаем, яко корабли с песнию отпущающе вспять возвращающеся целы и невредими приемлюще зовем: «Слава, Христе, пришествию твоему».

Мужеством души в веру вооружився, бурю и дождь и всякую воздушную нужду терпя, потщался еси сохранити заповедь отца своего духовнаго и того ради приял от Вседержителя Бога венець победный на страсти и на бесы исцеление.

Богородичен: Устави неуставное смущение, чистая Мати Божия, еже к Сыну Ти направляющи движение, воспевающих: Слава славе Твоей, слава, Христе, пришествию Твоему.
Песнь 5.

Ирмос. Мрак души моея отжени, светодавче Христе Боже, зачалобытную тьму. Разгнав бездныя, издаруй ми свет повелений твоих, Слове, да утренюя, прославляю тя.

Носиши мертваго, яко жива, в пустыню в Чюпу с собою и тамо молитвою на врага вооружашеся, нестерпимыя его стрелы сокрушая постом и терпением, дондеже приял, преподобне, помощь от вышняго.

Обновляешися яко орел, преподобне, измывся и очистився в пустыни от всех страстных деяний, и яко елень быстротекий ко источником вод очищаяся змииныя яди.

Видел еси зиждему святым Трифаном обитель в Печенге, за окияном морем, и тамо устремися видети того труды и подвизи. И пребыв немного время, пророчески тому о составлении обители прорече:

Оставляеши бо трифаново селение и возвращаешися паки к Керети,— вся тому изрек. О Трифане, сподобился еси обитель воздвигнути и братию собрати, будут бо людие и села зле неукротимы, яко дивии звери, твоей ярости и острожелчию подобящася.

Море убо на плещу своею тебе ношаше ис Печенги в пустыню в Чюпу, влеком корабли своими струями, идеже ядовитыя черви очистил еси и по тоням телеса мертвых востающа бесовским действом виде и сим уснути до Христова втораго пришествия повелеваеши, да не безсмертно пребудет злое, яко ж рече иже богословию тезоименитый Григорие.



Богородичен: Уловити мя всегда ищет прелукавый и от того мя сетей исхити, Владыце, и Божественным кровом крилу Твоею цела соблюди.
Пеcнь 6.

Ирмос. Бездна посдедняя и прегрешений буря смущает, и во глубину нужную реет мя нечаяние, но сам крепкую руку ми простри, яко Петрови ото тля, Боже мой, возведи мя.

Чювственныя страсти победив воздержания броздами, чюдодейственне Варламе, чистотою душевною божественно вооружився, стяжав безстрастие и целомудрие, им же Богови паче приближився.

Юности цвет, поты и труды умертвив воздержанием, в вышний вниде чертог во одежду оболчен, достойну звания, на ню ж и зван бысть украшен добродетелми, в невестнице неизреченныя славы возглегл еси.

Добродетели труды и поты, Варламе, покой со всеми святыми приемля, их же и возвесели своим житием.

Образы и подобие к добродетели, отче, возводя всех к высоте божественнаго рачения, добродетели прилежати наказуя.

Богородичен: Тебе общую любочестия, Всенепорочная, нашего естества вси славим, устна едина бывша, и едино согласие совершающа воспевающих Тя, едину Матерь неискусомужную [бывшую].

Кондак. Глас 4. Волнений множество не влажно проходя, безплотныя враги струями слез твоих крепко погрузил еси, богомудре Варламе преподобне, и чюдес дар прием, исцеляеши страсти всякия, моли непрестанно о всех нас.

Икос. Отверзи ми устне, преблаженне, богоприятными ти молитвами предстоя Богови, всеславне Варламе. Да воспою божественное твое житие и возглаголю достойной добродетели твои, еже на земли Христа ради совершил еси, преподобне, столп бо явися и правило светло иноком, равно аггелом, стяжав житие, в незаходимая воистинно вселився, моли непрестанно о всех нас.
Песнь 7.

Ирмос. Дети благочестивыя в Вавилоне телу златом не поклонишася, но посреде пещи пламенны прохлаждаеми, песнь воспеваху, глаголюще: Отец наших, Боже, благословен еси.

В молитвах бодренное и в пощении крепкое, и терпение во искушениих неослабное, ума чистотою, преподобне, показался еси, земля бо и земных достойно отступль, небесное обрет, наслаждение воспевая: Благословен Бог отец наших.

Острыя имея к Богу внимати страсти душетленныя усыпил еси, и рукоя ти благоплодия пожал еси, питая благочестно восхваляющих тя и поющих: Благословен Бог отец наших.

Ревностию Христовою ярость поострив непреклонно слезами и слезными каплями истиннаго плача. Все ярости и напрасньства пламень погасив желания безчестия несытна, и устну молчанием, вопияше: Благословен Бог отец наших.

Целомудрие, отче, притяжав, им же на божественную любовь возшед, прият дары исцеляти недуги душь и телес наших, ими же к Богу приближитися можем вопия: Благословен Бог отец наших.

Богородичен: Углем Исайя от Серафима от олтаря очищается, возопи велегласно: Се девая во чреве приимет и родит сына и нарекут имя ему Еммануил, яже есть сказаемо: С нами Бог. Ему же вопием: Благословен Бог отец наших.
Песнь 8.

Ирмос. Мосикейским арганом согласящим и людем, без числа кланяющимся телу сущу на молебне, трие отроцы песнословяху: Господа пойте и превозносите Его во веки.

Кроток и милостив, и чист быв, кротких землю достиг, отче, укроти настоящую бурю сердцу моему. Да в тишине божественней быв, песнословлю твоя подвиги воспевая: Господа пойте и превозноситя его во веки.

Естество плотьцкое повинув духови постом и воздержанием, душу же божественными дарованми просветив, превысок умом сущих в вещех явлься, невещественна дарования Духа Святаго приял еси, воспевая: Господа пойтя и превозноситя его во веки.

Рака твоя источает верным исцеление, память же твоя, блаженне, сияющи паче солнца и всем души просвещающи, и мира мысленнаго восхищающи поющих: Господа пойтя и превозносите его во веки.

Естеством добродетелей любве сопрягся отцу Трифану в духовных ему исправлениих в пусте моря с ним оземствуяся с причастное души очищающи, воспевающе: Господа пойте и превозносите его во веки.

Целиши независтно верно призывающии тя, целитель от Бога показася, очистник блаженне и прогонитель лукавым духом, яко звезда всесветлая от пустыни воссияв чюдес лучами, просвещая вопиющих: Господа пойтя и превозносите его во веки.

Кротостию, отче, наветы нося, терпя же и своя на тя востающая, отческим нравом последуя, тех житие в себе имея, приим от Бога действо благодати, пояше: Господа пойтя и превозносите его во веки.

Оружие убо пение, молитву же — стену, непорочную слезу — умывание имел еси, омывалище сквернам душевным, память же смертную сожителницу стяжав, преподобне, ее же ум очищь Бога зрети сподобися, поя: Господа пойтя и превозносите его во веки.

Морское ядро освятил еси, преподобне, кроплением священныя воды, яко паучину червие отгоня, не терпяще бо ти крепости духовныя зрети и нечювственная отбегающу Господу, тя всем прославльшу яко верна своего раба: Господа пойтя и превозносите Его во веки.

Богородичен: Ум убо нерожденный, Отец образно премудрым провещася, Слово же собезначална, соестественный Сын и Дух Святый, еже в Деве от Слова созда воплощение.
Песнь 9.

Ирмос. Тя, браку неискусимую, Матерь Бога Вышнего, тя паче ума рождьшую Словом Сущаго Бога и вышшую пречистых сил, немолчными славословлении величаем.

Слезная капля гасило стяжав еси, воистинну страстным розгорением и любовию огня Божественнаго росе совокупився Христу Богу нашему, тем же тя чтем, Варламе богомудре, и верою ублажаем.

Единое любви Христовы приложив свою душу, Варламе преподобне, и исполнитель заповедей Божиих многих чюдес приял еси благодать, всехвалне, тем же тя почитаем.

Рака мощей твоих, Варламе, источник показася исцелением, к ней же всяк притекаяи, яко от крина воды почерпает исцеление независтно и избавляется всяких страстей душевных и телесных. Сего ради тя ублажаем, преподобне.

Господь прославльши своего угодника, яко ни гробу ходатаю забвению того добродетели сокрыти, но трубы яснеиши вопием: Истекающими от него знаменми чюдне не точию же ближняя, но и далняя оглашая, проповедая мужа подвиги и труды.

Иже паметь твою священную творящим, отче, не престаи моля Избавителя даровати согрешением оставления и небесное царьство воприяти, идеже глас празднующих веселит вся.



О двоица присноблаженная, равночестная отца, Трифане и Варламе, яко едино блаженство имущих от Бога, версто предобрая, нас призывающих ваю от всех лютых спасати я теплым предстателством вашим вас восхваляющих.

Богородичен: Стешняет мя широта величий твоих, Владыце, подавляя слово от частости, и преславно ми приходит недоведети от благодушства, тем же иже толико Тя возвеличившая славим.

Тропарь Варламу Керетцкому, новому чюдотворцу. Глас 8. О тебе, отче Варламе, известен бысть спасения образ, восприимши бо крест последовал еси Христу, творящи же и учащи, еже презрети плоть, преходит бо прилежати же о души вещи безcмертней, тем же со аггелы радуется, преподобне, дух твой.



1 «Канон преподобному Варламу Керетьцкому, новому чюдотворцу». Сочинение Соловецкого аримандрита Сергия (Шелонина) (1-я пол. XVII в.). Рукописное собрание Псковского музея-заповедника. Ф. Никандровой пустыни. № 292. Лл. 413 – 420 об.





Смотрите также:
Тропари и кондаки святым Собора Кольских святых и чтимым иконам
191.28kb.
1 стр.
Тропари, кондаки, молитвы и величания Соловецким святым
393.78kb.
1 стр.
Тропари, кондаки, мо­лит­вы и величания избранные
405.85kb.
1 стр.
Собор Радонежских святых- престольный праздник Сергиевой Лавры
54.36kb.
1 стр.
Ооо«Бюро путешествий «Липецктурист» г. Липецк, пл. Петра Великого, 1
27.49kb.
1 стр.
Воскресенье, неделя Святых Отцов 1-го Вселенского собора
307.99kb.
1 стр.
§ 86. Христианский календарь. Легенды о святых. Acta sanctorum.
393.66kb.
2 стр.
Крещение духом святым
31.53kb.
1 стр.
Выступление Гуру на круглом столе. Будущее человечества и ведической Дхармы
64.21kb.
1 стр.
3 Подготовка и проведение vi-го Вселенского Собора. Орос vi-го Вселенского Собора
113.59kb.
1 стр.
Покров Пресвятой Богородицы
136.06kb.
1 стр.
1-ж/д станция Домодедово 2-Проект храма Всех святых, в земле Российской просиявших
56.72kb.
1 стр.